16 студзеня Беларускі дзяржаўны тэхналагічны ўніверсітэт наведаў Надзвычайны і Паўнамоцны Пасол Аб'яднаных Арабскіх Эміратаў у Рэспубліцы Беларусь Ібрагім Салім Махамед Аль-Мушаррах.

У ходзе сустрэчы рэктар БДТУ Ігар Войтаў азнаёміў госця з новымі напрамкамі развіцця ўніверсітэта ў галіне падрыхтоўкі кадраў і планамі па адкрыцці новых спецыяльнасцей, а таксама прадставіў навуковыя распрацоўкі вучоных універсітэта, якія з'яўляюцца найбольш перспектыўнымі для рэалізацыі сумесна з эмірацкімі партнёрамі. Ігар Войтаў звярнуўся да г-на Надзвычайнага і Паўнамоцнага Пасла з просьбай аказаць садзейнічанне ва ўстанаўленні партнёрскіх сувязей з установамі адукацыі ААЭ.

Ібрагім Салім Махамед Аль-Мушаррах адзначыў важнасць супрацоўніцтва паміж дзвюма краінамі ў галіне адукацыі і той факт, што ў БДТУ рыхтуюць інжынерныя кадры па шэрагу спецыяльнасцей, якія ў ААЭ з'яўляюцца дэфіцытнымі або адсутнічаюць. Асаблівую цікавасць для эмірацкага боку ўяўляе падрыхтоўка па такіх напрамках, як "зялёная" эканоміка, аднаўляльныя крыніцы энергіі, "зялёная" хімія, інжынерная экалогія, лясная гаспадарка, лесаразвядзенне. Вялікі патэнцыял нясе ў сабе ўзаемадзеянне ў сферы кліматычных змен і экалагічна чыстых тэхналогій.

Па выніках сустрэчы бакі дамовіліся аб узмацненні ўзаемадзеяння ў сферы пошуку партнёраў для рэалізацыі адукацыйных, навукова-тэхнічных і інавацыйных праектаў.